السلام عليكم ..

هذي دعاية حزام امان خطيره وحلوه ومعبره وبنفس الوقت بسيطه جداً ..

اعتقد قام بعملها مجموعة طلاب ..

Embrace Life - always wear your seat belt

هي مانسميها اليوم (حرف الواو) كلنا نعرف ان الحرف هذا مكانه ارفع من مرتبة وزير .. بمعنى ثاني انه يتعدى على كل شي حلو او غير حلو سوي او غير سوي ، وقصص (حرف الواو) كثيره بذكر منها قصص صارت لي شخصياً
مره قبل سبع سنين رحت اطلع رخصة قياده وطبعاً كالعاده لازم تجلس جنب خمسة أجانب بنقاليه وتركب معهم ومعكم العسكري بمعنى (7 اشخاص) بالسياره ، وطبعاً عارفين ان العامل توّه جاي من ديرته يعني نظيف ومافي ولا ريحه   انا ركبت معهم وكان لما يسوق بنقالي ويمشي 20 متر يوقفه ويقول ناجح .. كان يخليهم يمشون 20 متر مستقيم بدون إي انعطافات او حتى مايمدي الشخص انه يعشّق (يغير) القير للثاني الا وهو موقفه ، بمعنى انه كل واحد قيادته ماتعدت مدتها 3 دقايق .
وش راح يكون هذا البنقالي مستقبلاً ؟ سواق عائله وأطفال أو سواق ليموزين . تمام ؟
هنا بعد ماخلصو كل الخمسه وجا دوري بالقياده عذبني تعذيب ، (لف يمين ، رح يسار ، وقف ، ارجع على ورى ، تقدم ، انعطف يمين ، انعطف يسار ، انتبه جتك سياره لاتخلينا نموت) جلس معاي تقريباً نص ساعه كلها قياده وتعليمات هم وسيارتهم البايخه اللي يالله تشتغل ويالله تمشي . والبنقالي ماجلس دقيقتين
بالنهايه انا ارسب وهم ينجحون  من جد قهر  ، والأغرب من هذا كله انه فيه ناس رسبو وقالو لهم يراجعون اقرب فرع بالحي عندهم الا انا الوحيد قالو تعال هنا انت ، قلت انا مثلهم هذا المكان بعيد علي وهذا واحد انتم قلتوا له يراجع فرع حينا خلني مثله قال لا تعال هنا.. اممممم اتوقع ان عندهم واسطه لأنهم يضحكون معهم ويسولفون
بعدها حلفت ما أطلع رخصه ، وإلى الآن انا ماطلعت ولا رخصه وماغير قسايم × قسايم  ، إلى الآن مافي اي مشاكل .. طيب وين المشكله ؟
المشكله انه عندنا عامل مصري من 20 سنه تقريباً وإلى الآن مايعرف يسوق سياره أبد ، مايسوق غير دباب لا ويخاف بعد  ، طلع رخصة قيادة وهو بمكانه .. طيب شلون وش سويت؟ ، قالي لابغيت الشي انا اجيبه ، مايعرف يسوق ابد ولا مره ركب في مكان قائد السياره ومع ذلك يطلع رخصه بدون اختبارات او تدريب ، وانا اسوق ومن القهر افحط واطير بالسياره وبدون رخصه . وين المشكله ؟ هذي جزء من المشكله
المشكله الأمر والأدهى ان المصري العامل حقنا عنده واسطه بيطلع لي رخصه وانا قاعد :d وربي من جد امر غريب .. اجنبي يتوسط لأبن البلد انه يطلع رخصه يعني الحين المصري حقنا طلع أقوى مني بديرتي ، يتوسط لي ويحل أغلب مشاكل تعقيد الوزارات بعلاقاته
عرفتو كيف الواسطه تسوي ؟ حتى الأجنبي اذا معه واسطه تعدى هيبته وقوته بالديره اللي يترزق فيها لين تطغى على أهل البلد نفسهم وسكانها الأصللين ..

بقول سالفه بتضحكون .. نفس سالفة العسكري اللي قبل لكن انقذنتني رشة عطر
كنت مره مكلف من العمل (بالعمل مسائي) وانا عند مخرج 8 بالرياض كان فيه تفتيش وكنت مضلل السياره كلها اسود وعدم حمل رخصه وعدم إصدار رخصه عدم ربط حزام الأمان والسياره مهيب سيارتي ، سيارة بأسم اخوي يعني هذي فيها ست سنين سجن من القهر
وقفني العسكري وقال هات بطاقتك ووقف على جنب ، وكلمو راعي السطحه بيشيل سيارتي ، كان معاي واحد مصري واثنين اجانب وانا وواحد سعودي ثاني ، طبعاً العسكري وهو بيسجل القسيمه وبيشيلون سيارتي فجأه حركت شماغي (نسفت الشماغ على ورى ) والعسكري كأنه شمّ عطر وقال للمصري متعطر عطر (بريفلي هيلدز) قال المصري (ايه ؟ لاءه واللهي ياباشا ماعملتش عطر ، دنا واللهي ياسيدة الزابط مكنتش عارف ان الحزام ده مهم بالنسبه للدستور القيادي) قلت : انا بس مو عطر (بريفلي هيلدز) هذا عطر (شانيل).. قال العسكري (ايه نفس عطري  ، وشلون شكل جرة العطر ؟ ) قلت (شفافه والعطر لونه ذهبي) قال (خذ بطاقتك ولاتعود له) وكلم العسكري الثاني علشان (عطري) ومشيت ..
حتى العطر صار (واو)
وياكثر الواوات عندنا .. على قولة هيفا (بوس الواوا هات الواوا ) gt;

• اذا الواحد معه سياره زينه ، مرسّم (مشخص) صارت له واسطه ، شعبنا غريب يموت على شي اسمه ( انا جايك من طرف فلان ) .. وأهم شي انه (من طرف فلان)

قبل فتره سمعت نكته تقول :

وحده راحت لمحل بيع هدايا وقالت : لو سمحت عندك بطاقة (إلى حبي الوحيد) ؟ رد عليها العامل وقال فيه ، قالت طيب عطني عشرين كرت

يعني عندها 20 واحد وكلهم تقولهم أنت حبي الوحيد

ومن هذا المنطلق كتبت هذي الأبيات :

كسبت من حبك تناهيد واهات
وآلام في صدري عطتني قناعه

ان العشق أول على قولهم فات
أما عشق هاليوم سهلاً ضياعه

هذاك قال : أهواك ، بين البنيّات
ومن خلفها حرّيف لعب وصناعه

وهذيك قالت له : تراك أنت بالذات
اللي سلب فكري معه كل ساعه

وراحت لدكانا يبيع البطاقات
وقالت : أبي تختار بين البضاعه

كلمة أحبك بس أبيها كثيرات
وقامت توزعها لكل الجماعه

وكل عام وأنتم بخير .

 On the eve of Eid Al-Fitr.Pleased to extend congratulations to all my friends of my blog. May Allah Almighty accept your fasting and prayers. Our best wishes for long-lasting good health, joy and prosperity for all.

Happy Eid and best regards.

أصبحت إعلانات السيارات تتجه إلى تشويه سمعة العرب والمسلمين كما سبق أن اشرت إليه بموضوع Nissan Tida .

مادري وش المقصد من هذي الإعلانات وهل كل إعلان يستهتر بالعرب هو إعلان ناجح ؟؟ ..

للأسف ، ماعندنا ناس ترد على مثل هذي الدعايات المعاديه لنا لا بالصحف ولا المجلات ولا حتى الإذاعة والتلفزيون ..

شي يقهر ..!